Rovdyrskadane i Sogn og Fjordane har stabilisert seg med årlege utbetalingar på i overkant av ein million kroner Luster er i år den «store rovdyrkommunen», og står åleine for 60 prosent av erstatningsutbetalingane.

Totalt i fylket er det i år utbetalt 1135136 kroner i erstatning for sau, lam og geit drepne av freda rovvilt. I fjor vart det utbetalt til saman 1022903 kroner.

Jerven er, som vanleg dei siste åra, den som gjer størst innhogg i husdyrflokkane.

Det er ifølgje tala frå Fylkesmannen erstatta 94 sauer og 458 lam grunna jerv, 11 sauer og 87 lam grunna gaupe, 9 sauer og 49 lam grunna kongeørn og 1 sau og 9 lam etter angrep frå uspesifisert freda rovvilt. I tillegg er 9 kje erstatta etter at kongeørn har vore på ferde.

Statens Naturoppsyn, som har ansvaret for skadedokumentasjonen, har i år registrert eller kontrollert om lag 166 kadaver i Sogn og Fjordane. Tilsvarande tal for 2003 var 138.