– Denne gangbrua vil vekkje oppsikt langt utover Førde, trur dagleg leiar i Handelshuset AS, Jostein Fredly.

Fredag presenterte Fredly resultatet av arkitektkonkurransen gjeldande gangbru mellom eksisterande Handelshus og Handelshus 2, som er under bygging. Mellom fem forslag vart utkastet frå Kritt Arkitekter as i Oslo peikt ut som vinnar.

Målsetjinga til arkitektfirmaet har vore å skape bruovergangen som ein attraksjon og eit vitalt bindeledd mellom det nye og det eksisterande kjøpesenteret. I tillegg tenkjer Kritt Arkitekter seg at overgangen skal framstå som ein byport for Førde, og som eit spektakulært ikon for området.

Unikt

– Vi er samde med juryen i at Kritt presenterer ein unik idé og eit unikt konsept. I tillegg har framlegget deira den største bruksverdien, og har mange andre funksjonar enn berre å vere ein overgang.

Fredly fortel at neste steg no er å søkje kommunen om løyve til å få byggje gangbrua slik Kritt Arkitekter har foreslått.

– Eg har tru på at politikarane vil sjå det same som juryen. At denne gangbrua kan verte noko som Førde er kjend for, ein attraksjon. Eit slikt bygg kan heve gangbrua frå å vere noko negativt, til å verte ein positiv faktor for byen, meiner Fredly.

Netting

Ein «nettingstruktur» er tenkt å omhylle heile gangbrua, som er støtta av to V-forma beresølyer. Om dagen vil overgangen vere ein lett og lys kontrast til dei mørkare teglbygningane, og når det er mørkt ute vil den lyse som ein stor lampe. Innvendig skal løysinga vere så open som mogleg, her kan det vere pauseareal og kommersielle tilbod. «Boblene» er tenkt å innehalde butikkar, leikerom for barn eller liknande. Arkitektfirmaet tenkjer seg gangbrua som ein treffstad i Førde. Total breidde på dette prosjektet er sett til 12 meter.

Pris

– Å rekne ut kostnader var ikkje ein del av oppgåva i konkurransen, så vi veit enno ikkje kva det vil koste å byggje denne gangbrua. Men vi har på førehand sagt at vi kan akseptere meirkostnader mot ein arkitektonisk gevinst, smiler Fredly, som er spent på reaksjonane frå folk i Førde.

Juryen i arkitektkonkurransen har vore samansett av sivilarkitektane Per Kleve (Bergen), Hallvard Naustdal (Førde), Rikke Charlotte Sundt (Bergen), og ingeniør Vilhelm Andenæs (Førde). Jostein Fredly har vore juryens sekretær, utan stemmerett.

Oppleving

– Brua står i klar og enkel kontrast til omgjevnadene, og rommet gir gode moglegheiter for variert bruk. Prosjektet har lagt opp til ein høg opplevingsfaktor, og framstår som det beste av dei fem utkasta, skriv juryen om vinnaren av konkurransen.

Dei andre som deltok i konkurransen var Arkitektgruppen Cubus as i Bergen (2. premie), Arkitektkontoret Grieg as i Bergen (3. premie), 1.2.3&Sivilarkitekter as i Asker (upremiert) og Qvam as i Førde (upremiert). Etter juryen si meining har konkurransen sett lys på oppgåva på ein variert måte.