60 kilo spissbukk-filet skal sikre OL-siger

-Dette er vanvittig moro, og fantastisk god PR, ikkje berre for oss, men for heile Sogn og Fjordane som råvarefylke, seier ein tilfreds dagleg leiar ved Norsk Hjortesenter på Svanøy, Johan Trygve Solheim.

Tok kontakt

Kokkelandslaget tok kontakt tidleg i mars med bakgrunn i det dei hadde høyrt om råvarene frå Svanøy frå andre kjende kokkar.

-Vi begynner å bli anerkjende for produktet vårt, det ryktast i gastronomiske krinsar, smiler Solheim som har feira fleire triumfar i det siste. Førre helg var med å vinne konkurransen «Kokk og bonde»-finalen i Stavanger med hjort som hovudrett.

Kokkelandslaget tel ni deltakarar som held på i tre-fire år med å jobbe seg saman. Dei har i lang tid lege i treningsleir annan kvar helg i kokkanes eige treningssenter i Bærum, med tanke på OL i Tyskland. Medan Bocuse d'Or som Førde-kokken Terje Ness gjekk til topps i, er eit slags VM for individuell kokke-kunst, er OL internasjonal lagsport.

Mykje kjøt

Hittil har landslaget konsentrert seg om kaldmat-utstillinga, no startar treninga på varmmaten. Kokkane har tinga rundt 60 kilo filet, og det betyr at det vil gå med 30 Svanøy-hjortar.

-Dei må trene på råvarer som er identisk med konkurranse-produktet, forklarar Solheim som fortel at det er ei utfordring å skaffe så mykje hjortekjøt.

-Hjort er ein avgrensa ressurs, og biffdelane som dei kjende kokkane helst vil ha, er ikkje så store. Eg plar fleipe med at dei er ikkje mykje til kokkar om dei ikkje klarar å lage noko edelt også ut av dei andre delane på hjorten, seier Solheim.

Dette er elles ei utfordring hjortesenteret har gått laus på med bokprosjektet «Hjort frå hale til hovud» der ein tek sikte på at heile hjorten skal nyttast.

Spissbukkar

Det hjortelandslaget vil ha, er fileten av 17 månader gamle spissbukkar frå hjortefarmen. Dette er det beste av det beste, fastslår Solheim.

-Det må sjølvsagt til i ein knallhard OL-finale. Har du det beste av råvarar og det beste av kokkar som i tillegg har dagen, så vil det vere håp om siger. Det ville ikkje vere dumt for oss, seier ein ferierande Solheim som i går var på veg mot Bærum-kanten.

-Det er ikkje utenkjeleg at eg dukkar opp i treningslokalet til kokkane i løpet av veka. Eg vil sjå at lokala held mål.

-Det er klart at vi må setje krav til kokkane. Det er ikkje kven som helst som får kjøpe kjøt hjå oss. Slik sett er det eit privilegium at spurnaden etter hjortekjøt er mykje større enn produksjonen, seier Solheim.

Utfordring

Den første sendinga med Svanøy-hjort går nedover i neste veke. Johan Trygve Solheim trur kokkane skal bli nøgde.

-Ei utfordring er å halde jamn kvalitet på så mykje kjøt, men det skal vi klare, seier Solheim som har 150 dyr gåande på farmen på Svanøy.

-Mat og lokale råvarer frå Sogn og Fjordane ser ut til å vere inn. At hjortefarmen skal levere kjøt til ei OL-tevling, er utruleg moro og flott PR for alle. Det er berre å stå på. Vi skal prøve å gjere vårt, seier leiaren på Norsk Hjortefarm.