I 2011 omkom 36 personar i 35 ulykker på vegane i Sogn og Fjordane, Hordaland og Rogaland. Det er tre fleire enn i 2010.

7 av desse ulykkene skjedde i Sogn og Fjordane, 19 i Hordaland og 10 i Rogaland, viser ein rapport frå Ulykkesanalysegruppa i Statens vegvesen region vest.

I rapporten går det fram at Sogn og Fjordane i 2011 hadde 6,5 drepne i trafikken per 100.000 innbyggjarar, som er det høgste talet i region vest.

Hordaland hadde 3,9 drepne per 100.000 innbyggjarar og Rogaland 2,3.

Det var møte- og utforkøyringsulykker som førte til flest dødsfall på vestlandsvegane i 2011. 15 av dødsfalla skuldast møteulykker og åtte omkom etter utforkøyringsulykker.

- Vi har registrert eit mønster med fleire møteulukker dei siste åra. Utforkøyringsulukkene går ned, men det er likevel desse to ulukkestypane som tek flest liv. Talet på fotgjengarar og syklistar som mister livet i trafikken auker dessverre også, seier Hans Olav Hellesøe, leiar av Ulukkesanalysegruppa i Region vest i ei pressemelding.

27 av dei drepne i trafikken på Vestlandet i 2011 var menn og ni kvinner. Seks av dei omkomne kvinnene var bilførarar, ein bilpassasjer, ein var syklist og ei kvinne var fotgjengar. Sju menn omkom i mc-ulykker og to eldre menn omkom på moped, viser tala frå Vegvesenet.