Dette spørsmålet stiller Nelly Ramstad (68) frå Førde, som fann ei parkeringsbot på 700 kroner på frontruta etter ei treningsøkt på Friskis & Svettis i førre veke.

Det var verken politiet eller eit parkeringsselskap som hadde skrive ut gebyret, men Norsk Motor Import AS, som eig parkeringsplassen Ramstad hadde parkert på.

Såg skiltet i dagslys
- Eg vart veldig overraska. For det første var den store plassen så godt som tom, så eg stod ikkje i vegen for nokon. For det andre hadde eg ikkje sett noko skilt om at ein ikkje kunne parkere der, seier Ramstad.

Då ho reiste tilbake til staden dagen etterpå, kunne ho konstatere at det er sett opp eit skilt som signaliserer privat parkering med varsel om avgift ved parkering utan løyve.

Parkert inne
Dagleg leiar Roy Valvik i Norsk Motor Import meiner at dei ikkje bøtelegg, men skriv ut gebyr for bilar som parkerer utan løyve.

- Vi har sett oss nøydde til å innføre dette, då vi til tider har opplevd at portane våre har blitt parkert inne, seier Valvik.

Han legg til at dei ikkje er ute etter å ta nokon.

Politiet: - Ikkje ulovleg
- Men skal ei privat bedrift kunne bøteleggje på same måte som politiet då, spør Ramstad, og legg til at ho hadde respektert skiltet dersom ho hadde sett det den kvelden ho fekk bota.

Ved Sogn og Fjordane politidistrikt opplyser politifullmektig Anette Stegegjerdet Nordberg at politiet ikkje kan sjå at bøtelegginga er ulovleg.

Heller ikkje Statens vegvesen eller Førde kommune kan sjå at bedrifta har gjort noko ulovleg.