På spørsmål om kva for straff dei fryktar aller mest ved brot på Vegtrafikklova, svarer 36 prosent av norske sjåførar at det er bøter.

19 prosent er mest redde for prikkbelastning. Det viser ei spørjeundersøking YouGov har gjort for If Skadeforsikring.

Førarkortet ryk på åtte prikkar
- Ei bot svir i lommeboka, og dei fleste tenkjer vel at dei aldri klarer å få så mange som åtte prikkar, seier fagsjef Kurt Isak Undereidet i If Skadeforsikring til nyheitsbyrået Newswire.

Førarkortet vert inndrege i eit halvt år dersom du får åtte prikkar i løpet av tre år.

Undersøkinga viser også at menn fryktar bøter meir enn kvinner, og det er med god grunn.

Det er nemleg ein overvekt av menn som har fått bot i løpet av livet bak rattet, 56 prosent av mannlege sjåførar mot 37 prosent av kvinnelege sjåførar.

108 med åtte prikkar
Tal frå Politidirektoratet ved inngangen til 2012 viser at 108 bilførarar hadde samla nok prikkar til å miste førarkortet i løpet av 2011.

Det er akkurat dobbelt så mange som eitt år tidlegare.

- Frå i sommar vart det lettare å pådra seg prikkar. Regelendringa kan forklare heile oppgangen, seier politiinspektør Jan Morgan Guttormsen i Politidirektoratet.

Ferske sjåførar hardare straffa
Den viktigaste regelendringa 1. juli 2011 vart at ferske innehavarar av førarkort blir straffa med dobbelt så mange prikkar dei to første åra.

Det betyr for eksempel at dei blir straffa med seks prikkar dersom dei vert teken i 70 km/t i ei 50-sone.

97 prosent av prikkane kjem som følgje av for stor fart.

Dette får du prikkar for.