– Dette avlivar alle mytar om giddalaus og uengasjert ungdom, seier Arnestad.

Han har nettopp sett 16 til 18 år gamle ungdommar i nesten tre timars fri utfalding på scena i den krevjande musikalen signert komponisten Jerry Bock med tekstar av Sheldon Harnick og Joseph Stein. I lange periodar gløymde vi nesten at aktørane ikkje var blaserte proffar, men speleglad ungdom som får utvikle og foredle sitt talent på det som kan kallast talentfabrikken på Sandane.

– Mi første store rolle

– Eg trur det gjekk bra, seier Per Inge Hove. 18-åringen frå Vik tolka rolla som Tevye, faren i den russiske jødefamilien denne musikalen handlar om.

– Mi første, og kanskje siste store rolle, seier han beskjedent etter nærmast å ha blitt kasta inn i sitt livs hittil tøffaste utfordring. Hove gjekk nemleg første på allmennlinja ved Hafstad vidaregåande. Sist haust flytta han til Sandane og musikklinja. Dermed var vegen kort til hovudrolla i musikkspelet.

– Eg har til dags dato ikkje angra på valet, smiler 18-åringen.

Før generalprøva var han spent på om stemma heldt. Det har nemleg røynt hardt på dei siste dagane. Men den heldt gjennom heile framsyninga.

– Må halde kjeft

– No må eg pleie stemmebanda godt ved å halde mest mogeleg kjeft, drikke mykje vatn og te, smiler Hove. Vel vitande om at alt søndag kveld er det duka for ny framsyning. Måndag kveld er det ekstraframsyning, også den i Aulaen på Firda vidaregåande skule.

– Han kom som kalla, og gleid rett inn i rolla som Tevye, både med tanke på utstråling, song og ikkje minst evna til å hugse og framføre tekstane, seier musikklærar Trygve Apalset.

Fabel og Fjøgl

Musikalen opnar den store jubileumsveka ved Firda vidaregåande. Etter premiera søndag går deg slag i slag med framsyningar av dagens elevar og tidlegare elevar ved musikklinja. Blant hovudattraksjonane finn vi «Fabel» og «Fjøgl», begge gruppene har tidlegare musikklinje-elevar i sin midte.

– I løpet av denne veka vil vi vise den store breidda ved musikklinja, seier rektor Kjell Arnestad.