27. desember oppdaga tilsette i Førde kommune at det var dumpa hushaldningsavfall ved småbåthamna.

Etter å ha sett over avfallet, fann kommunen dokumentasjon på at søppelet stammar frå ei hushaldning i Hafstadvegen i Førde.

- Vi har vore i kontakt med ein av bebuarane på den aktuelle adressa, og orienterte vedkommande om at dette er ulovleg, skriv leiar brann og redning, Bernhard Øberg, i eit brev til politiet.

Bebuaren i Hafstadvegen fekk ein frist til 2. januar til å rydde opp og fjerne avfallet, og vedkommande skulle bringe meldinga vidare til den ansvarlege.

Då Førde kommune var på synfaring 2. januar, var det ikkje gjort noko opprydding av søppelet, og kommunen har derfor meldt forsøplinga til politiet.

Då firda.no var på staden 12. januar, låg framleis søppelet der.