Steinar Bauge skriv følgjande frå pinseturen 2006:

2. pinsedag såg det ut til å bli fint fjellvêr, så eg starta heimefrå klokka 07.00 og køyrde til Rørvika og parkerte bilen der. Planen er å komme ned att i Rørvika. Sykla så til Ospelia og gjekk opp lia. Kom til Kvamshesten etter ca. 3 timar. Då det var første gongen eg var på Kvamshesten brukte eg tida godt og naut utsikten og tok eindel bilete.

Gjekk så vidare vestover rabbane under Kvamshesten mot Rørvikrimma, og turen til Blegja vart ekstra lang denne dagen då sola bløytte opp snøen så det var tungt å ta seg fram. Brukte 3,5 timar på turen ut til varden. Ved varden på Blegja sat to ungdomar frå Førde, som hadde gått frå Rørvika og bore skia opp til Nipevatnet og gått på ski opp ura under Blegja og ned igjen samme vegen.Ved varden var det så stilt og fint denne dagen at ei fyrstikk brann. Det hadde vore fleire personar på Blegja denne fine dagen.

Nedturen frå Blegja er lang, men var nede i Rørvika etter 12 opplevingsrike timar i eit fantastisk fjellmasiv i Ytre Sunnfjord.

firda.no takkar for bileta, og er viss på at dei er til glede for lesarane.